शिक्षण मंत्रालय
'विकसित भारत बिल्डथॉन २०२५' मुळे नवनिर्मितीच्या पुनर्जागरणाला चालना मिळेल आणि तरुण नवप्रवर्तक आत्मनिर्भर भारताचे चालक म्हणून सक्षम होतील - श्री धर्मेंद्र प्रधान
बिल्डथॉनचा समारोप जानेवारी २०२६ मध्ये होणार, १००० हून अधिक विजेत्यांचे निकाल आणि सत्कार
पोस्ट केल्याची वेळ: २३ सप्टेंबर २०२५, सायंका
ळी ५:२५ वाजता, पीआयबी दिल्ली द्वारे
केंद्रीय शिक्षण मंत्री श्री धर्मेंद्र प्रधान यांनी आज 'विकसित भारत बिल्डथॉन २०२५' या उपक्रमाचा शुभारंभ केला. ही एक अभूतपूर्व देशव्यापी नवनिर्मिती चळवळ आहे, जी संपूर्ण भारतातील शाळांमधील विद्यार्थ्यांना सहभागी करून घेईल. 'विकसित भारत बिल्डथॉन २०२५' चे आयोजन शिक्षण मंत्रालयाच्या शालेय शिक्षण आणि साक्षरता विभागाने (DoSEL), नीती आयोगाच्या अटल इनोव्हेशन मिशन (AIM) आणि अखिल भारतीय तंत्रशिक्षण परिषदेच्या (AICTE) सहकार्याने केले आहे. या कार्यक्रमादरम्यान, मंत्र्यांच्या हस्ते विकसित भारत बिल्डथॉनचे जिंगल आणि लोगो (बोधचिन्ह) देखील लाँच करण्यात आले.
यावेळी शालेय शिक्षण आणि साक्षरता विभागाचे सचिव श्री संजय कुमार; पत्र सूचना कार्यालयाचे प्रधान महासंचालक श्री धीरेंद्र ओझा; AICTE चे अध्यक्ष प्रा. टी. जी. सीताराम; AICTE चे उपाध्यक्ष डॉ. अभय जेरे; नीती आयोगाच्या अटल इनोव्हेशन मिशनचे मिशन संचालक श्री दीपक बागला; शालेय शिक्षण आणि साक्षरता विभागाचे अतिरिक्त सचिव श्री धीरज साहू; तसेच मंत्रालय, केंद्रीय विद्यालय संघटन (KVS) आणि नवोदय विद्यालय समितीचे (NVS) वरिष्ठ अधिकारी उपस्थित होते.
याप्रसंगी बोलताना मंत्री म्हणाले की, आतापर्यंतचा सर्वात मोठा शालेय हॅकेथॉन असलेला 'विकसित भारत बिल्डथॉन', तळागाळातील नवनिर्मितीच्या संस्कृतीला अधिक मजबूत करेल. हा हॅकेथॉन विद्यार्थ्यांना 'व्होकल फॉर लोकल', 'आत्मनिर्भर भारत', 'स्वदेशी' आणि 'समृद्धी' या चार संकल्पनांवर आधारित उत्पादने तयार करण्यास आणि त्यावर विचार करण्यास प्रोत्साहित करेल. ते पुढे म्हणाले की, हा उपक्रम विद्यार्थ्यांच्या नवनवीन शोधांचा उत्सव साजरा करेल, देशात नवनिर्मितीचे पुनर्जागरण घडवेल आणि तरुण पिढी समृद्ध, विकसित आणि आत्मनिर्भर भारताचे प्रमुख वाहक बनेल हे सुनिश्चित करेल.
सचिव श्री संजय कुमार यांनी एक सविस्तर आढावा सादर केला, ज्यातून बिल्डथॉनची रूपरेषा स्पष्ट झाली आणि संपूर्ण भारतात विद्यार्थ्यांच्या नवनिर्मितीला चालना देण्यासाठी त्याचे महत्त्व अधोरेखित झाले.
Information of Viksit Bharat Buildathon 2025 - Watch the video
बिल्डथॉनची उद्दिष्ट्ये:
राष्ट्रीय विकासासाठी सृजनशील विचारांना प्रेरणा देणे.
आत्मनिर्भरता आणि शाश्वत विकासाला चालना देणे.
शाळांना एका सुसूत्रित नवनिर्मितीच्या उपक्रमात गुंतवणे.
संभाव्य जागतिक विक्रमाद्वारे भारताला 'जागतिक नवनिर्मितीची राजधानी' म्हणून स्थापित करणे.
तरुण समस्या-निवारकांना राष्ट्रीय आणि जागतिक स्तरावर सन्मानित करणे.
हा उपक्रम 'स्कूल इनोव्हेशन मॅरेथॉन २०२४' च्या यशावर आधारित आहे, ज्यातून 'स्टुडंट इनोव्हेटर प्रोग्राम' (SIP) आणि 'स्टुडंट आंत्रप्रेन्योरशिप प्रोग्राम' (SEP) सारखे कार्यक्रम सुरू झाले. तसेच, अटल टिंकरिंग लॅब्समधून अनेक पेटंट आणि स्टार्टअप उपक्रम उभे राहिले.
'विकसित भारत बिल्डथॉन'ची रूपरेषा:
२३ सप्टेंबर: आजपासून 'विकसित भारत बिल्डथॉन'चा प्रवास सुरू होत आहे.
२३ सप्टेंबर ते ६ ऑक्टोबर: विद्यार्थ्यांना 'विकसित भारत बिल्डथॉन' पोर्टलवर (https://vbb.mic.gov.in/) नोंदणी करण्यासाठी संधी असेल.
६ ऑक्टोबर ते १३ ऑक्टोबर: शाळांसाठी तयारीचा कालावधी असेल, ज्यात शिक्षक विद्यार्थी संघांना पोर्टलवर नोंदणी प्रक्रियेसाठी मार्गदर्शन करतील. यानंतर विद्यार्थी त्यांच्या कल्पना आणि प्रोटोटाइप (प्रतिकृती) पोर्टलवर सादर करतील.
१३ ऑक्टोबर: बिल्डथॉनचा मुख्य भाग, 'थेट सुसूत्रित नवनिर्मिती कार्यक्रम' (Live Synchronized Innovation Event) आयोजित केला जाईल.
१३ ऑक्टोबर ते ३१ ऑक्टोबर: कार्यक्रमानंतर विद्यार्थी त्यांच्या अंतिम प्रवेशिका सादर करतील.
१ नोव्हेंबर ते ३१ डिसेंबर: तज्ज्ञांची एक समिती दोन महिन्यांच्या कालावधीत सादर केलेल्या प्रवेशिकांचे मूल्यांकन करेल.
जानेवारी २०२६: बिल्डथॉनचा समारोप होईल, ज्यामध्ये निकालांची घोषणा केली जाईल आणि १००० हून अधिक विजेत्यांचा सत्कार केला जाईल.
कार्यक्रमात 'विकसित भारत बिल्डथॉन २०२५' च्या संकल्पना आणि उद्दिष्टांवर प्रकाश टाकणारा एक व्हिडिओ देखील प्रदर्शित करण्यात आला.
कोणत्याही टिप्पण्या नाहीत:
टिप्पणी पोस्ट करा